Volker Frech machte sich Gedanken über die Entstehung unserer Pfingstweide...
Lesen Sie hier, zu welch überraschenden Feststellungen er kam:
Am Anfang domols, 's is lang her,
da war die Erde wüscht und leer...
' s war alles dunkel außerum;
kä Viehzeig gab's, 's war alles stumm.
Sowohl zum Rhei' hie, oder grad,
do, - wu mer heit uff Mörsch nausfahrt -
do hotts bloß Unkraut, Gschlambs un Moor
un Ungeziwwer, ja 's is wohr,
un nauszu's Richtung Edigum,
trieb sich als nachts e Irrlicht rum
un Lumbevieh mit wiehschte Aage
deß schlacht mer heit noch uff de Maage.
Viel später dann, nooch lange Johre,
- domols war ich noch net gebore -
do hänn sich Mensche hie verloffe;
(im Altrhei' sinn als paar versoffe)
un Fischer gab's un Maurer a;
mit denne kam dann a ihr Fraa
sinn seßhaft worre, kriehten Kinner...
Bald kamen Missionare hinner...
mer war fer's Chrischdedum bereit,
drum hott’s heit noch viel fromme Leit';
grad in de Pfingschtweid', - bin ich froh -,
sunscht wär'n kä brave Mensche do...
Des Land wurd drucke dann gelegt.
Es wurd’ gezaggert un geeggt.
Dickworzle gab's, Riewe un Kraut,
un sogar Woi' wurd' angebaut !
Un wann mer's richtig iwwerleggt,
hänn die genau gewißt, was schmeckt...
Un glaabt mer's, ich mach do kä Faxe,
drum sinn hier Mensche schä gewachse.
De Herrgott dut ' se drum belohne
Un loßt se in de Pfingschtweid' wohne.
Doch vorher, Leit, ihr wisst es schon,
do war so e Reformation.
Die Gegend war, - es klingt heit komisch, -
vum Glaawe her christlich katholisch.
Doch en Herr Luther, 'n schlaue Mann,
wu was bewegt hott, un was kann,
babbt an 're Kerch, - 's is schun lang her- ,
en Zettel an die Kerchedeer.
Fer'n Mensch, mit neiem Lewensmut,
wu net katholisch lewe dut...
De Erzbischof dut ihn a' ranze,
drum muß er a in Worms a' danze.
's liegt net weit weg vun unserm Ort,
drum sag ich' s Eich mit einem Wort:
weil Pälzer Bodenständigkeit
gewachse war, un schlau un weit,
deswege, - un 's is gar net komisch -,
drum war die erschd Kerch hier katholisch...
Danach, - knapp dreimol hunnert Johr -
do kam in Frankreich ebbes vor.
Des war, ihr Leit', ihr wißt es schon:
Die weltberiehmt Revolution.
's wurd alles annerscht, alles nei;
- hott mer gemähnt - , ich sag's eich glei:
mer setzt Kerch un Regierung matt,
un hott kä Anscht vorm Kähnisch g'hatt,
un a kä Angscht vor Bolizei,
un vor de Bürgermeeschderei...
Un weil's war, -später- , wie de Luther;
- so hott's verzehlt, - mir, als mei Mutter-
hott mer dann später, -es is wohr -,
ihr Leit, do bin ich gut defor;
gebaut im Zentrum mittedrin,
- voll Zuversicht un Glaubenssinn -,
schä passend, hell un a pedantisch
die anner Kerch- , die protestantisch...
Dann kam e Zeit, hän Kohldamp g'schowe...
Den Zeitraum will ich garnet loowe;
die Pälzer Männer un ihr Fraue,
die könnt' mer heit als noch bedaure.
Wann mer's bedenkt, so dief verdrosse -
so' schääni Gegend zu verlosse -...
Sie zogen nach Amerika;
mit Kind un Keggel... un de Fraa,
mit Base, Neffe, Unkel, Dande,
mit Enkel, Hund un Anverwandte
mit Oma, Opa, Kinnerscheeß
un allem, was ich nimmie wähß
wann'ren die aus, so war deß ewe,
un wollten dort in Freiheit lewe.
Un wurden dort gut uffgenumme!!!
Obwohl se sinn vum Ausland kumme...
Un heitzudaag gebbt's mir zu denke!
Un mei' Gedanke duhn mich lenke,
wann ich mir vorstell, wie vor Jahre,
mei Vorfahre gegange ware!!!
Un uffg'numm' worre sinn in Friede...
sinn mir, - deß -, in de Lag' zu biete???
Die Asylante, die heit' kumme?
Die Ehrliche, wu mer genumme?
Vermißt hänn, Freiheit, Menschlichkeit,
Kultur un Friede, 's gibt's noch heit'
drum kumm' 'se zu uns, in dem Sinn,
weil mir so brave Mensche sinn.
In Hoffnung, daß in uns'rer Mitte
ihr Brauchtum, Religion, un Sitte
so akzeptiert wer'n, wie se sinn.
Sowas, des is doch bei uns drin!!!
Doch missen die a, so soll's kumme
uns bissel a entgegekumme...!
Kaum, korzdruff, kam die Anilin -
( die steht bei uns ball mittedrin)-.
Do kamen Leit aus alle Länner:
Franzose, Spanier un Englänner,
un Derge, Asiate, Neger,
un Eskimos, Indianer, Kreter,
un Mensche aus 'm Baltikum,
Schlowacke, - dort aus Edigum -,
korzum, - Leit' , wu do schaffe wollte;
deß werd bei uns gut abgegolte.
Mit guter Arbeit gibt's Devise,
wobei mal wieder ist bewiese,
daß jeder hier uff dieser Welt,
wo mit viel Fleiß sei Feld bestellt ,
hineinpaßt, hier in unser'n Ort,
werd akzeptiert,- mit einem Wort -;
auch mir war'n froh, vor hunnert Jahr...
Mir Pälzer in Amerika!
Daß mer dort uhne Vorbehalte,
durft dort de Wohlstand mitgestalte.
Drum helft all' denne, im Ort drin,
all denne, wu kä Pälzer sinn.
Duht die, die woll'n, all integriere,
un helft, daß Sache net passiere,
wie Sache, die vor 70 Jahren
passiert sinn, bei uns. - Doch do - waren
kä Pfingstweidler am Werk, känn Spott,
weil die's noch garnet gewwe hott...
So langsam kumm ich jetzt zum Schluß.
Weil ich jo irng'wann uff' hern muß.
Mer lewen heit, ihr Leit,'s is wohr
im Ort jetzt üwwer 30 Johr.
Mer hänn e Schul , e Bolizei;
hänn ball e Bürgermeschderei...?
hänn viel Vereine un a Sänger.
Bei uns, do rückt mer immer enger.
Mer feiren Feste hier im Ort,
drum sag ich Euch mit einem Wort:
"Macht weiter so, als wie bisher,
do duht sich a känn Fremde schwer.
Wer sich do wohlfiehlt, froh un frisch,
do in de Pfingstweid, so wie ich,
dem duht die Herzklapp net versande...
Wer freundlich is, bei uns im Lande,
un mithilft, - dort - wu's als duht klemme,
un duht sich, wie 's sich's g'hert, benemme;
dem werd a g'holfe, Leit' ich glaab,
ihr wer'n dann seh', - am schääne Dag,
do duh mer uns ganz lieb vertrage,
wie die zwee, vor ganz viele Jahre
im Paradies, - do gabs känn Streit
so, wie als heitzutag, ihr Leit !!!
Un wer gern mitmacht, -unverdrosse -,
werd nie aus de G'sellschaft geschlosse.
Doch wann's net klappt, dem sag ich glei,
kummt s' bescht' bei uns erscht garnet 'rei..,
sunscht geht's dem so, wie domols a
dem Adam un wie seiner Fraa...
Ich hoff, ganz deitlich un verständlich,
( denn Pälzer Sprooch is unvergänglich)
erklärt hab', weil's bei uns so schää is;
warum do jeder gern dehäm is.
Ich hoff, 's bleibt weiter so un recht
deß wünscht Euch all
de Volker Frech
